💐SPECIAL STORY💐ഗായകരിലെ ഏകാന്തപഥികൻ – പി ജയചന്ദ്രൻ

മലയാള പാട്ടുകളിലലിഞ്ഞ ധനുമാസ ചന്ദ്രൻ പി ജയചന്ദ്രൻ ഭാവ ഗായകൻ പൊലിഞ്ഞത് മലയാള ഗാന മേഖലയിൽ മറയ്ക്കാനാകാത്ത വിടവായിരിക്കും. അദ്ദേഹത്തിൻ്റെ കണ്ഠത്തിൽ നിന്നൊഴുകിയ ഗാനങ്ങളെപ്പോഴും വരണ്ട മലയാള മനമണ്ണിലേക്ക് ഒഴുകിയ ഒരു തെളിനീർ നദി പോലെ തെളിമയുള്ളതായിരുന്നു. “പണി തീരാത്ത വീട് ” ലെ “നീലഗിരിയുടെ സഖികളെ ” വിളിച്ച് അതൊഴുകി മലയാളക്കരയെ നനച്ചു. ഉമ്മാച്ചുവിലെ പി ഭാസ്ക്കരൻ , ദക്ഷിണാമൂർത്തി ടീമിൻ്റെ “ഏകാന്ത പഥികൻ ഞാൻ ” എന്ന ഗാനം – ജീവിതത്തിലും ഗാനാലാപനത്തിലും ആ ഏകാന്ത പാതയിലൂടെ നടന്നു കൊണ്ടിരുന്നു. ” മഞ്ഞലയിൽ മുങ്ങിത്തോർത്തിയ ” ഈ കണ്ഠത്തെ പി ഭാസ്ക്കരനും ദേവരാജൻ മാഷും ഉരുക്കി മിനുക്കി. ‘സന്ധ്യക്കെന്തിനു സിന്ദൂരം’ എന്ന് പാടിയ ഗായകൻ്റെ ജീവിതത്തിനും വേറൊരു തൊടുകുറിയുടെ ആവശ്യമില്ലായിരുന്നു. “ചന്ദനത്തിൽ കടഞ്ഞെടുത്തൊരു ” ഈ ഗാന ശില്പ ഭംഗിയെ വീണ്ടും മലയാളക്കരയിൽ ഉടലെടുക്കാൻ ഈ ഒഴിവ് നികത്താൻ കാലങ്ങളോളം നിലനിർത്തേണ്ടി വന്നേക്കും ‘ പ്രണയത്തിൻ്റെ ഭാവഗാനങ്ങളിലൂടെ മലയാളികളുടെ ചുണ്ടിൽ മർമ്മരം തീർത്ത ഗായകന് “മോഹം കൊണ്ടു ഞാൻ ദൂരയേ തോ’ ” പ്രതീക്ഷ നിലനിർത്താൻ മലയാള മനസ്സിൽ കഴിഞ്ഞു. യുവതയുടെ തുടിപ്പിന് വർണ്ണമേകി ബിച്ചുതിരുമല, വിദ്യാസാഗർ ടീമിൻ്റെ നിറം എന്ന ചിത്രത്തിലെ ” പ്രായം നമ്മിൽ മോഹം നൽകാനും മോഹത്തിന് വേഗതയേറ്റാനും കഴിഞ്ഞത് ജയചന്ദ്രലാപനമായിരുന്നു. “വടക്കും നാഥന് സുപ്രഭാതം പാടി” വണ്ണാത്തി ക്കുരുവികളെ പാടിയുണർത്താനും ഭക്തിഗാനങ്ങളുടെ ഒരു മാല ചാർത്താനും ഈ അനശ്വര ഗായകനു കഴിഞ്ഞിട്ടുണ്ടായിരുന്നു. ” മലയാള ഭാഷതൻ മാദക ഭംഗി” ആവോളം നുകരുകയും പൊഴിക്കുകയും ചെയ്ത ഭാവഗായകൻ പാട്ടുള്ളിടത്തോളം ലോകത്തിലെ ഏതു കോണിലും മലയാളാധരങ്ങളിൽ മൊഴിഞ്ഞു കൊണ്ടേയിരിക്കും. മലയാളത്തിൻ്റെ ഭാവഗായകൻ പി ജയചന്ദ്രന് കീഴരിയൂർ വാർത്തകളുടെ ആദരാഞ്ജലികൾ