കോൾഡ്രിഫ് കഫ് സിറപ്പ് കഴിച്ച ഒരു കുട്ടികൂടി മരിച്ചു; അസിത്രോമൈസിൻ ആന്റിബയോട്ടിക് മരുന്നിൽ പുഴുക്കൾ; മധ്യപ്രദേശിൽ സ്ഥിതി ഗരുതരം

ഭോപ്പാൽ: രാജ്യത്ത് വിഷാംശം കലർന്ന കഫ് സിറപ്പ് കഴിച്ച് ഒരു മരണം കൂടി റിപ്പോർട്ട് ചെയ്തു. കോൾഡ്രിഫ് കഫ് സിറപ്പിൽ നിന്നുള്ള വിഷബാധ മൂലമുണ്ടായ ഗുരുതരമായ വൃക്ക തകരാറ് മൂലം മധ്യപ്രദേശിലാണ് ഒരു കുട്ടി കൂടി മരിച്ചത്. ഇതോടെ ദുരന്തത്തിൽ മരിച്ചവരുടെ എണ്ണം 24 ആയി.

മഹാരാഷ്ട്രയിലെ നാഗ്പൂരിലെ ഒരു ആശുപത്രിയിൽ നിന്നാണ് ഏറ്റവും പുതിയ മരണം റിപ്പോർട്ട് ചെയ്തത്. സെപ്റ്റംബർ 14 മുതൽ ചികിത്സയിലായിരുന്ന ചിന്ദ്വാര ജില്ലയിലെ ചൗരൈ പ്രദേശത്തെ മൂന്നര വയസ്സുള്ള അംബിക വിശ്വകർമ എന്ന കുട്ടിയാണ് വൃക്കസംബന്ധമായ തകരാറിനെ തുടർന്ന് മരിച്ചു.

സെപ്റ്റംബർ 3 മുതൽ ചിന്ദ്വാര ജില്ലയിലെ വിവിധ ഭാഗങ്ങളിൽ നിന്നുള്ള 21 കുട്ടികളാണ് കഫ് സിറപ്പ് വിഷബാധ മൂലമുണ്ടായ ഗുരുതരമായ വൃക്ക തകരാറുകൾ മൂലം ചിന്ദ്വാരയിലെയും നാഗ്പൂരിലെയും ആശുപത്രികളിൽ മരിച്ചത്. പാണ്ഡുർണ ജില്ലയിൽ നിന്നുള്ള ഒരാളും ബേതുൽ ജില്ലയിൽ നിന്നുള്ള രണ്ട് കുട്ടികളും ഉൾപ്പെടെ മൂന്ന് കുട്ടികൾ കൂടി സമാനമായ ആരോഗ്യ പ്രശ്നങ്ങൾ മൂലം ഇരയായതോടെ, തെക്കൻ മധ്യപ്രദേശ് ജില്ലകളിൽ നിന്നുള്ള ആകെ കുട്ടികളുടെ എണ്ണം ഇപ്പോൾ 24 ആയി. രാജസ്ഥാനിൽ റിപ്പോർട്ട് ചെയ്ത ഒരു മരണം കൂടി ചേർത്താൽ 25 കുട്ടികളുടെ ജീവനാണ് കോൾഡ്രിഫ് കഫ് സിറപ്പ് എടുത്തത്. മൂന്ന് ‘നിലവാരമില്ലാത്ത’ ഓറൽ കഫ് സിറപ്പുകൾക്കെതിരെ ലോകാരോഗ്യ സംഘടന (ഡബ്ല്യുഎച്ച്ഒ) നേരത്തെ മുന്നറിയിപ്പ് നൽകിയിരുന്നു. കോൾഡ്രിഫ്, റെസ്പിഫ്രഷ് ടിആർ, റീലൈഫ് എന്നിവയ്‌ക്കെതിരെയാണ് ഡബ്ല്യുഎച്ച്ഒ റിപ്പോർട്ട്.

ഇതിനിടെ, മധ്യപ്രദേശിൽ കുട്ടികളുടെ മരണത്തെക്കുറിച്ചുള്ള ആശങ്കകൾ വർദ്ധിച്ചുവരുന്ന സാഹചര്യത്തിൽ, ഗ്വാളിയോറിലെ ഒരു സർക്കാർ ആശുപത്രിയിൽ ഒരു കുട്ടിക്ക് നൽകിയ ആൻറിബയോട്ടിക് മരുന്നിന്റെ കുപ്പിയിൽ വിരകളെ കണ്ടെത്തിയതായി പരാതി ഉയർന്നു. കുട്ടിക്ക് മരുന്ന് നൽകിയ ഒരു സ്ത്രീയുടെ പരാതിയെത്തുടർന്ന്, മൊറാർ പട്ടണത്തിലെ സർക്കാർ ആശുപത്രിയിലെ അസിത്രോമൈസിൻ ഓറൽ സസ്പെൻഷന്റെ മുഴുവൻ സ്റ്റോക്കും സീൽ ചെയ്തു, കൂടാതെ സാമ്പിളുകൾ പരിശോധനയ്ക്കായി ഭോപ്പാലിലെ ഒരു ലബോറട്ടറിയിലേക്ക് അയച്ചിട്ടുണ്ട്.

കുട്ടികൾക്ക് വിവിധ അണുബാധകൾക്ക് സാധാരണയായി അസിത്രോമൈസിൻ നിർദ്ദേശിക്കാറുണ്ട്. സംശയാസ്‌പദമായ മരുന്ന് മധ്യപ്രദേശ് ആസ്ഥാനമായുള്ള ഒരു കമ്പനി നിർമ്മിച്ച ഒരു ജനറിക് പതിപ്പായിരുന്നുവെന്ന് റിപ്പോർട്ടുണ്ട്. ആശുപത്രിയിൽ സൂക്ഷിച്ചിരുന്നതും വിതരണം ചെയ്തതുമായ 306 കുപ്പികളും തിരിച്ചുവിളിച്ച് പിടിച്ചെടുത്തതായി റിപ്പോർട്ടുകൾ പറയുന്നു. 

ചില കുപ്പികളിൽ പ്രാഥമിക പരിശോധനയിൽ പ്രാണികളുടെ ലക്ഷണങ്ങൾ കണ്ടെത്തിയിട്ടില്ല, എന്നാൽ സുരക്ഷ ഉറപ്പാക്കുന്നതിനായി പരിശോധനകൾ നടക്കുന്നുണ്ട്. ചില കുപ്പികൾ ഭോപ്പാലിലെ ഒരു ലബോറട്ടറിയിലേക്ക് അയച്ചിട്ടുണ്ട്, അതേസമയം ഒരു സാമ്പിൾ കൊൽക്കത്തയിലെ സെൻട്രൽ ഡ്രഗ് ലബോറട്ടറിയിലേക്കും അയയ്ക്കുമെന്ന് ഇന്ത്യൻ എക്സ്പ്രസ്സ് റിപ്പോർട്ട് ചെയ്തു.