ഇടുക്കിയിൽ കനത്ത മഴ തുടരുന്നതിനിടെ മുല്ലപ്പെരിയാർ അണക്കെട്ടിൽ ജലനിരപ്പ് ഉയരുന്നു. അതിവേഗത്തിലാണ് ജലനിരപ്പ് ഉയരുന്നത്. 10 മണിക്കൂര്ക്കൊണ്ട് അണക്കെട്ടില് ഉയര്ന്നത് ആറടിയിലധികം വെള്ളമാണ്. ജലനിരപ്പ് ഉയർന്നതോടെ അണക്കെട്ടിൽ നിന്ന് പുറത്തേക്ക് ഒഴുക്കുന്ന വെള്ളത്തിൻ്റെ അളവ് കൂട്ടും. നിലവിൽ 139.30 അടിയാണ് ജലനിരപ്പ്. ഷട്ടർ ഒന്നര മീറ്റർ കൂടി ഉയർത്തി സെക്കൻഡിൽ പതിനായിരം ഘനയടി വെള്ളം ഒഴുക്കും.
രാവിലെ ഒൻപത് മണിയോടെയാണ് ഷട്ടറുകൾ വീണ്ടും ഉയർത്തുക. വെള്ളിയാഴ്ച രാത്രിയും ശനിയാഴ്ച രാത്രിയും ഇടുക്കി ജില്ലയിലെ വിവിധയിടങ്ങളിൽ കനത്ത മഴയാണ് പെയ്തത്. അണക്കെട്ടിന്റെ വൃഷ്ടി പ്രദേശത്ത് കനത്ത മഴയാണ് ലഭിക്കുന്നത്. ഇതാണ് ജലനിരപ്പ് ഉയരാൻ കാരണം. ഈ വർഷം രണ്ടാം തവണയാണ് മുല്ലപ്പെരിയാറിന്റെ അണക്കെട്ടുകൾ തുറക്കുന്നത്.
പെരിയാർ തീരത്തുള്ളവർ ആശങ്കപ്പെടേണ്ടതില്ലെന്നും എന്നാൽ ജാഗ്രത ആവശ്യമാണെന്നും അധികൃതർ അറിയിച്ചിരുന്നു. അതേസമയം ഇടുക്കി ജില്ലയിൽ കനത്ത മഴയിൽ വ്യാപക നാശം. കുമിളി മേഖലയിൽ പലയിടത്തും മണ്ണിടിഞ്ഞും മലവെള്ളപ്പാച്ചിലുണ്ടായും വ്യാപക നാശനഷ്ടമാണുണ്ടായത്. കുമളി പത്തുമുറി റൂട്ടിൽ മണ്ണിടിച്ചിലുണ്ടായി ഗതാഗതം പൂർണമായും തടസപ്പെട്ടു. കുമളി ആനവിലാസം റൂട്ടിലും പലയിടത്തും മണ്ണിടിച്ചിലുണ്ടായി.
